ବ୍ୟୁରୋ: ଟଙ୍କା ନ ଦେବାରୁ ବାପାକୁ ହତ୍ୟା କଲା ପୁଅ। ଏଭଳି ଏକ ଅମାନସିକ ଘଟଣା ଘଟିଛି ଭୁବନେଶ୍ୱର ମଞ୍ଚେଶ୍ବର ଅଞ୍ଚଳରେ। ସାମାନ୍ୟ ଟଙ୍କା ପାଇଁ ଜଣେ ବାପାକୁ ଛୁରୀ ଭୁସି ହତ୍ୟା କଲା ପୁଅ । ଏହି ଘଟଣା ଆଜି ଭୋର ସମୟରେ ଘଟିଥିବା ବେଳେ, ହସ୍ପିଟାଲ ଯିବା ବାଟରେ ଆଖି ବୁଜିଛନ୍ତି ବାପା । ପୋଲିସ୍ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏହି ହତ୍ୟାକାଣ୍ଡ ଘଟଣାରେ ପ୍ରତିକ୍ରିୟା ରଖିଛନ୍ତି ଭୁବନେଶ୍ବର ଡିସିପି ପ୍ରତୀକ ସିଂ । ସେ କହିଛନ୍ତି, ଅଭିଯୁକ୍ତ ଅନିରୁଦ୍ଧ ଚୌଧୁରୀ ଏକ ଘରୋଇ କଲେଜର ପ୍ରଫେସର ଭାବେ ଚାକିରୀ କରିଛନ୍ତି। ସେ ଲକ୍ଷାଧିକ ଟଙ୍କା ଋଣ ବୋଝରେ ବୁଡି ରହିଥିଲେ । ଋଣ ସୁଝିବା ପାଇଁ ସେ ବାପା ସୁନିଲ ଚୌଧୁରୀଙ୍କୁ ଟଙ୍କା ମାଗିଥିଲେ । ହେଲେ ବାପା ଟଙ୍କା ଦେବାକୁ ମନା କରିଦେବାରୁ, ଅନିରୁଦ୍ଧ ରାଗିଯାଇ ଛୁରୀ ଭୁସି ବାପା ସୁନିଲଙ୍କୁ ହତ୍ୟା କରିଥିବା ସୂଚନା ଦେଇଛନ୍ତି ଡିସିପି ପ୍ରତୀକ ସିଂ । ଭାରତୀୟ ନ୍ୟାୟ ସଂହିତା ଧାରା ୧୦୩ ଅନୁଯାୟୀ ମାମଲା ରୁଜୁ ହୋଇଛି।