ବ୍ୟୁରୋ: ଖଣି ଅଧିକାରୀଙ୍କ ନାଁରେ ଖଣି ଲିଜଧାରୀଙ୍କୁ ବଟି ମାଗିବା ଅଭିଯୋଗରେ ପୋଲିସ କନେଷ୍ଟବଳ ତାପସ କୁମାର ବେହେରାଙ୍କୁ ନିଲମ୍ବିତ କରିଛନ୍ତି ଖୋର୍ଦ୍ଧା ଏସପି ସାଗରିକା ନାଥ। ସୂଚନା ମୁତାବକ ପୋଲିସ କନେଷ୍ଟବଳ ତାପସ ବେହେରା ଖୋର୍ଦ୍ଧା ଖଣି ଅଧିକାରୀ ଜଗନ ବେହେରାଙ୍କ ନାଁ ରେ ଜଣେ ଖଣି ଲିଜଧାରୀଙ୍କୁ ବଟି ମାଗିଥିଲେ। ଖଣି ଲିଜଧାରୀ ଏ ଖବର ଖଣି ଅଧିକାରୀଙ୍କୁ ଜଣାଇଥିଲେ। ଖଣି ଅଧିକାରୀ ଖବର ଜାଣିବା ପରେ ଉକ୍ତ ପୁଲିସ କର୍ମଚାରୀଙ୍କୁ ଧରିବା ଲାଗି ଯୋଜନା କରିଥିଲେ। ଯୋଜନା ମୁତାବକ ଖଣି ଲିଜଧାରୀଙ୍କ ଠାରୁ ଉକ୍ତ କନେଷ୍ଟବଳ ତାପସ ନୂଆବସଷ୍ଟାଣ୍ଡ- ଚଣ୍ଡୀଚୁଆ ଛକ ନିକଟରେ ଟଙ୍କା ନେବା ବେଳେ ଖଣି ଅଧିକାରୀ ପହଞ୍ଚି ଯାଇଥିଲେ। ଖଣି ଅଧିକାରୀଙ୍କୁ ଦେଖି ତାପସ ଘଟଣାସ୍ଥଳରୁ ଗାଡି ଛାଡି ପଳାଇଥିଲେ । ଖବର ପାଇ ପିସିଆର ପହଁଚି ଉକ୍ତ ପୁଲିସ କର୍ମଚାରୀଙ୍କ ଗାଡି କୁ ଜବତ କରିଥିଲେ। ଖଣି ଅଧିକାରୀଙ୍କ ଅଭିଯୋଗ କ୍ରମେ ଖୋର୍ଦ୍ଧା ଟାଉନ ଥାନାରେ ନଂ ୪୨୦/୨୪ ଏକ ମାମଲା ରୁଜୁ ହୋଇଛି। ଖୋର୍ଦ୍ଧା ଏସପି ସାଗରିକା ନାଥ ଏହି ଘଟଣାର ଅଭିଯୋଗକୁ ଭିତ୍ତିକରି କନେଷ୍ଟବଳ ତାପସ କୁମାର ବେହେରାଙ୍କୁ କାର୍ଯ୍ୟରୁ ନିଲମ୍ବିତ କରିଛନ୍ତି।